Симеон Полоцкий

Вертоград многоцветный

Глас народа

Что наипаче от правды далеко бывает,
гласу народа мудрый муж то причитает.
Яко что-либо народ обыче хвалити,
то конечно достойно есть хулимо быти.
И что мыслить — суетно, а что поведает,
то никоея правды в себе заключает.
Еже гаждает — дело то весма благое,
а еже ублажает — то бохма есть злое.
В кратце, что-либо хвалит — то неправо в чести.
Мир сей непостоянный весь лежит в прелести.
Не веруй убо гласу общему народа
ищи в деле правды человеча рода.
Слово ветр развевает, а кто тому верит,
безразсудно срамоты мзду себе возмерит.

Ехидна

Ехидна, елма ся самцу совокупляет,
главу его, в уста вземши, огризает.
Но чада смерть отца матери отмщают,
ибо в чреве сущи, оно пригризают.
Тако в зачатии чад отец мертвится,
в рождении тех же зла мати губится.

Змий

Въ некоей стране змий превелий бяше,
близ моста лежи, вред лютый творяше.
Кони и волы и всяк скот хищал есть
путь творшыя люди поглощал есть.
Темъ путем святый епископ пустися
Донат, а змий на нь гладный устремися,
Разверз челюсти, святый наплеваше
въ гортань, и знамя крестно содеяше.
Того не терпя, змий той умертвися,
о нем же страна вся возвеселися.
Осмь супруг волов зла гада везоша
на поле, тамо огнем и сожгоша.

Многоглаголание

В много ли глаголании выну грех бывает,
ибо язык вещает, их же ум не знает.
Лучше есть язык от словес держати,
нежели много онем глаголати.
Молчание бо мало повреждает,
а глагол многих погубляет.

Преходят вся

Что-либо в мире украшает тело
и на что оку зрети есть весело,
подобне сени все то претекает
след не остает.

Ли яко гонец скоро пребегаяй
и на един час нигде почиваяй,
вся мимо идут. Печаль оставляют,
не утешают.

Еще подобна кораблю текущу,
морския воды носом си секущу,
иже океан всескоро преходит
следа не родит.

Мощно и орлу быстру уравняти,
иже есть силен всескоро летати,
и недовидне стреле в цель идущей,
аер секущей.

Напоследок же, яко изчезает
безплодный облак, а не одождает
нив земных; тако все, что в мире красно,
тлится напрасно.