Фольклорный архив Башкирского государственного университета

 

ISBN 978-5-87604-352-8

 

К оглавлению издания.

Название: <Таҡмаҡтар (Такмаки).>
Жанр: Такмак.
Место записи: БАССР, Салаватский район, д. Шаганай.
Год записи: 1964 г.
Язык: башкирский.
Источник публикации: том № 1 фольклорного архива кафедры башкирской литературы. Материалы Салаватской экспедиции под руководством М.Х. Мингажетдинова; л. 92‑94.
Записано студентами З.Буляковой, И.Шараповым, И.Хабрахмановой от Сании Газизовой (59 лет).

<Таҡмаҡтар>

Салауат районы, Шағанай ауылында йәшәүсе Сания Ғәзизованан (59 йәштә) 3.Бүләков, И.Шарапов һәм И.Хабрахмановалар тарафынан яҙып алынды.

Стена көҙгөм ватылды
Ал пудр яғынғанда.
Ҡысҡырып йырлап ебәрәм,
Өҙөлөп һағынғанда.

Атҡайымдың дағаһы һынды
Йәлләйем алдырырға,
Һин йәлләмәһәң, мин йәлләйем
Яттарға ҡалдырырға.

Атҡайымдың дағаһы һынды
Уны һыуға ташланым.
Көҙгө япраҡтар кеүек
Һарғая ла башланым.

Лимон һары, лимон һары,
Лимон һары үҙенә.
Бары лимон һарылары
Сыҡты минең йөҙөмә.

Аппаҡ тышлы мамыҡ мендәр
Кәштә башҡайҙарында.
Ҡайғы ла бар, хәсрәт тә бар
Минең башҡайҙарымда.

Күктә күгәрсен гөрләмәй,
Күктә гөрләй самолет.
Йөрәк ярһыуға сама юҡ,
Күрмәй һине сара юҡ.

<Сәс үргесем, сәс үргесем,
Сәсемде үрер өсөн.
Интизарҙар булып бөттөм
Һине бер күрер өсөн.

Аҡлы ситса күлмәгемдең
Биҙәге ҡыяр-ҡыяр.
Туғаным менән һөйләшеп
Ҡасан телдәрем туяр.

Ҡаҙ ҡанаты ҡаурый-ҡаурый,
Сәләм яҙырға ярай.
Ир ҡанаты малдар даулай,
Ҡыҙ ҡанаты йәр һайлай.

Беҙҙең артта бер ҡойо
Ҡойоһо ла ысын инде.
Беребеҙ анда, беребеҙ бында
Бик ҡыйын да һуң инде.

Тәҙерәнән мин ҡарайым
Иҫкән һалҡын елдәргә.
Осоп ҡына ҡайтһаң ине
Тыуған-үҫкән илдәргә.

 

Ссылка на эту публикацию:

Таҡмаҡтар [Электронный документ] // Фольклорный архив Башкирского государственного университета: электронное научное издание / под ред. Б. В. Орехова, А. А. Галлямова. [2011—2024]. Дата обновления: 25.10.2018. URL: http://nevmenandr.net/pages/bashfolk.php?id=50 (дата обращения: 28.03.2024).