«Слово о полку Игореве»: Параллельный корпус переводов: Реконструкция А. А. Зимина

Реконструкция А. А. Зимина

Реконструкция текста Слова о полку Игореве // Зимин А. А. Слово о полку Игореве. — СПб.: Дмитрий Буланин, 2006. — С. 484—490.

1. Не лѣпо ли ны бяшетъ, братие, начяти старыми словесы трудныхъ повѣстий о пълку Игоревѣ, Игоря Святъславлича!
2. Начати же ся тъй пѣсни по былинамь сего времени, а не по замышлению Бояню.
3. Боянъ бо вѣщий, аще кому хотяше пѣснь творити, то растѣкашется мыслию по древу, сѣрымъ вълкомъ по земли, шизымъ орломъ подъ облакы.
4. Помняшеть бо, речѣ, първыхъ временъ усобицѣ. Тогда пущашеть 10 соколовь на стадо лебедѣй, которой дотечаше, та преди пѣсьпояше старому Ярослову, храброму Мстиславу, иже зарѣза Редедю предъ пълкы касожьскыми, красному Романови Святъславличю.
5. Боянъ же, братие, не 10 соколовь на стадо лебедѣй пущаше, нъ своя вѣщиа пръсты на живая струны въскладаше; они же сами княземъ славу рокотаху.
6. Почнемъ же, братие, повѣсть сию отъ стараго Владимера до нынѣшняго Игоря, иже истягну умь крѣпостию своею и поостри сердца своего мужествомъ,
7. наплънився ратнаго духа, наведе своя храбрыя плъкы на землю Половѣцькую за землю Руськую.
8. Тогда Игорь възрѣ на свѣтлое солнце и видѣ отъ него тьмою вся своя воя прикрыты.
9. И рече Игорь къ дружинѣ своей:
10. «Братие и дружино! Луце жъ бы потяту быти, неже полонену быти.
11. А всядемъ, братие, на свои бръзыя комони, да позримъ синего Дону».
12. Спала князю умь похоти, и жалость ему знамение заступи, искусити Дону великаго.
13. «Хощу бо, — рече, — копие приломити конець поля Половецкаго съ вами, русици. Хощу главу свою приложити, а любо испити шеломомь Дону».
14. О Бояне, соловию стараго времени! Абы ты сиа плъкы ущекоталъ, скача, славию, по мыслену древу, летая умомъ подъ облакы, спивая славы обаполы сего времени, рища въ тропу Трояню чресъ поля на горы.
15. Пѣти было пѣсь Игореви, того (Олга) внуку:
16. «Не буря соколы занесе чресъ поля широкая, — галици стады бѣжать къ Дону великому».
17. Чили въспѣти было, вѣщей Бояне, Велесовь внуче:
18. «Комони ржуть за Сулою, — звенить слава въ Кыевѣ. Трубы трубять въ Новѣградѣ, — стоять стязи въ Путивлѣ!». Игорь ждетъ мила брата Всеволода.
19. И рече ему буй туръ Всеволодъ:
20. «Одинъ братъ, одинъ свѣтъ свѣтлый — ты, Игорю, оба есвѣ Святъславличя!
21. Сѣдлай, брате, свои бръзыи комони,
22. а мои ти готови, осѣдлани у Курьска напереди.
23. А мои ти куряни свѣдоми къмети, подъ трубами повити, подъ шеломы възлелѣяны, конець копия въскръмлени,
24. пути имь вѣдоми, яругы имъ знаеми, луци у нихъ напряжени, тули отворени, сабли изъострени,
25. сами скачють, акы сѣрыи влъци въ полѣ, ищучи себе чти, а князю славы».
26. Тогда въступи Игорь князь въ златъ стремень и поѣха по чистому полю.
27. Солнце ему тъмою путь заступаше.
28. Нощь стонущи ему грозою. Птичь убуди. Свистъ звѣринъ въста близ.
29. Дивъ кличетъ връху древа, велитъ послушати земли незнаемѣ, Влъзѣ, и Поморию, и Посулию, и Сурожу, и Корсуню, и тебѣ, Тьмутораканьскый блъванъ.
30. А половци неготовами дорогами побѣгоша къ Дону великому. Крычатъ тѣлѣгы полунощы, рци лебеди роспужени. Игорь къ Дону вои ведетъ.
31. Уже бо бѣды его пасуть птиць под облакы. Влъци грозу въсрожатъ по яругамъ. Орли клектомъ на кости звѣри зовутъ. Лисици брешутъ на чръленыя щиты.
32. О Руская земле! Уже за шеломянемъ еси!
33. Длъго ночь мркнетъ.
34. Заря свѣтъ запала. Мъгла поля покрыла.
35. Щекотъ славий успе. Говоръ галичь убуди.
36. Русичи великая поля чрьлеными щиты прегородиша, ищучи себѣ чти, а князю славы.
37. Съ зарания въ пяткъ потопташа поганыя плъкы половецкыя и, рассушясь стрѣлами по полю, помчаша красныя дѣвкы половецкыя, а съ ними злато, и паволокы, и драгыя оксамиты.
38. Орьтъмами, и япончицами, и кожухы начашя мосты мостити по болотомъ и грязивымъ мѣстомъ, и всякыми узорочьи половѣцкыми.
39. Чрьленъ стягъ, бѣла хорюговь, чрьлена чолка, сребрено стружие храброму Святьславличю!
40. Дремлетъ въ полѣ Ольгово хороброе гнѣздо, далече залетѣло.
41. Не было нѣ в обидѣ порождено, ни соколу, ни кречету, ни тебѣ,чръный воронъ, поганый половчине!
42. Гзакъ бѣжитъ сѣрымъ влъкомъ, Кончакъ ему слѣдъ править къ Дону великому.
43. Другаго дни велми рано кровавыя зори свѣтъ повѣдаютъ.
44. Чръныя тучи съ моря идутъ, хотятъ прикрыти 4 солнца, а въ нихъ трепещуть синии млънии.
45. Быти грому великому, итти дождю стрѣлами съ Дону великаго!
46. Ту ся копиемъ приламати, ту ся саблямъ потручяти о шеломы половецкыя, на рѣцѣ на Каялѣ, у Дону великаго.
47. О, Руская землѣ! Уже за шеломянемъ еси!
48. Се вѣтри, Стрибожи внуци, вѣютъ съ моря стрѣлами на храбрыя плъкы Игоревы!
49. Земля тутнетъ. Рѣкы мутно текуть. Пороси поля прикрываютъ.
50. Стязи глаголютъ: половци идуть отъ Дона, и отъ моря,
51. и отъ всѣхъ странъ. Рускыя плъкы отступиша.
52. Дѣти бѣсови кликомъ поля прегородиша, а храбрии русици преградиша чрълеными щиты.
53. Яръ туре Всеволодѣ! Стоиши на борони, прыщеши на вои стрѣлами, гремлеши о шеломы мечи харалужными!
54. Камо, туръ, поскочяше, своимъ златымъ шеломомъ посвѣчивая, тамо лежатъ поганыя головы половецкыя,
55. поскепаны саблями калеными шеломы оварьскыя отъ тебе, яръ туре Всеволоде!
56. Кая раны дорога брата, забывъ чти и живота, и града Чрънигова, отня злата стола, и своямилыя хоти красныя Глѣбовны свычая и обычая?
57. Были вѣчи Трояни, минула лѣта Ярославля. Были плъци Олговы, Ольга Святьславличя.
58. Тъй бо Олегъ мечемъ крамолу коваше и стрѣлы по земли сѣяше,
59. ступаетъ въ златъ стремень въ градѣ Тьмутороканѣ.
60. Тот же звонъ слыша давный великый Ярославль
61. сынъ Всеволодъ, а Владимиръ по вся утра уши закладаше въ Черниговѣ.
62. Бориса же Вячеславлича слава на судъ приведе, и на Канинузелену паполому постла за обиду Олгову, храбра и млада князя.
63. Съ тоя же Каялы Святоплъкь полелѣя отца своего междю угорьскими иноходьцы ко святѣй Софии къ Киеву.
64. Тогда при Олзѣ Гориславличи сѣяшегся и растяшеть усобицами, погибашеть жизнь Даждьбожа внука. Въ княжихъ крамолахъ вѣци человѣкомь скратишась.
65. Тогда по Руской земли рѣтко ратаевѣ кикахуть, нъ часто врани граяхуть, трупиа себѣ дѣляче, а галици свою рѣчь говоряхуть, хотять полетѣти на уедие.
66. То было въ ты рати и въ ты плъкы, а сицей рати не слышано! Съ зараниа до вечера, съ вечера до свѣта летятъ стрѣлы каленыя, гримлютъ сабли о шеломы, трещать копиа харалужныя
67. въ полѣ незнаемѣ среди земли Половецкыи. Чръна земля подъ копыты, костьми была посѣяна, а кровию польяна, тугою взыдоша по Руской земли.
68. Что ми шумить, что ми звенить
69. давечя рано предъ зорями? Игорь плъкы заворочаетъ, жаль бо ему мила брата Всеволода.
70. Бишася день, бишася другый. Третьяго дни къ полуднию падоша стязи Игоревы.
71. Ту ся брата разлучиста на брезѣ быстрой Каялы.
72. Ту кроваваго вина не доста.
73. Ту пиръ докончаша храбрии русичи: сваты попоиша, а сами полегоша за землю Рускую.
74. Ничить трава жалощами, а древо с тугою къ земли преклонилось.
75. Уже бо, братие, невеселая година въстала, уже пустыня силу прикрыла.
76. Въстала обида въ силахъ Дажьбожа внука, вступила дѣвою на землю Трояню, въсплескала лебедиными крылы, на синѣмъ море у Дону плещучи. Убуди жирня времена. Усобица
77. княземъ на поганыя погыбе. Рекоста бо братъ брату: «Се мое, а то мое же». И начяша князи про малое «се великое» млъвити, а сами на себѣ крамолу ковати.
78. А погании съ всѣхъ странъ прихождаху съ побѣдами на землю Рускую.
79. О! Далече зайде соколъ, птиць бья къ морю.
80. А Игорева храбраго плъку не крѣсити.
81. За нимъ кликну Карна и Жля, поскочи по Руской земли,
82. смагу мѣчючи въ пламянѣрозѣ. Жены руския въсплакашась, а ркучи:
83. «Уже намъ своихъ милыхъ ладъ ни мыслию смыслити, ни думою сдумати, ни очима съглядати, а злата и сребра ни мало того потрепати».
84. А въстона бо, братие, Киевъ тугою, а Черниговъ напастьми.
85. Тоска разлияся по Руской земли. Печаль жирна тече средь земли Рускый.
86. А князи сами на себе крамолу коваху.
87. А погании сами побѣдами нарищуще на Рускую землю,емляху дань по бѣлѣ отъ двора.
88. Тии бо два храбрая Святъславлича, Игорь и Всеволодъ, уже лжу убуди которою, то бяше успилъ отецъ ихъ Святъславь грозный великый Киевскый.
89. Грозою бяшеть притрепалъп своими сильными плъкы и харалужными мечи наступи на землю Половецкую, притопта хлъми и яругы, взмути рѣки и озеры, иссуши потоки и болота, а поганаго Кобяка изъ Лукуморя отъ желѣзныхъ великихъ плъковъ половецкихъ, яко вихръ, выторже. И падеся Кобякъ въ градѣ Киевѣ, въ гридницѣ Святъславли.
90. Ту нѣмци и венедици, ту греци и морава поютъ славу Святъславлю, кають князя Игоря, иже погрузи жиръ во днѣ Каялы рѣкы половецкия, рускаго злата насыпаша.
91. Ту Игорь князь высѣдѣ изъ сѣдла злата, а въ сѣдло кощиево.
92. Уныша бо градомъ забралы, а веселие пониче.
93. А Святъславь мутенъ сонъ видѣ
94. въ Киевѣ на горахъ. «Синочь съ вечера одѣвахъте мя, — рече, — чръною паполомою, на кроваты тисовѣ.
95. Чръпахуть ми синее вино съ трудомь смѣшено,
96. сыпахуть ми тъщими тулы поганыхъ тльковинъ великый женчюгь на лоно,
97. и нѣгуютъ мя. Уже дьскы безъ кнѣса в моемъ теремѣ златовръсѣмъ.
98. Всю нощь съ вечера босуви врани възграяху,
99. у Плѣсньска на болони бѣша дебрьски сани и несошася къ синему морю».
100. И ркоша бояре князю:
101. «Уже, княже, туга умь полонила.
102. Се бо два сокола слѣтѣста съ отня стола злата поискати града Тьмутороканя, а любо испити шеломомь Дону. Уже соколома крильца припѣшали поганыхъ саблями, а самаю опуташа въ путины желѣзны.
103. Темно бо бѣ въ 3 день: два солнца помѣркоста, оба багряная стлъпа погасоста и съ ними молодая мѣсяца, Олегъ и Святъславъ, тъмою ся поволокоста.
104. На рѣцѣ на Каялѣ тьма свѣтъ покрыла.
105. По Руской земли прострошася половци, аки пардуже гнѣздо, и въ морѣ погрузиста, и великое буйство подасть Хинови.
106. Уже снесеся хула на хвалу.
107. Уже тресну нужда на волю.
108. Уже връжеса дивь на землю.
109. Се бо готския красныя дѣвы въспѣша на брезѣ синему морю, звоня рускымъ златомъ, поютъ время бусово, лелѣютъ месть Шароканю.
110. А мы уже, дружина, жадни веселия».
111. Тогда великий Святславъ изрони злато слово слезами смѣшено, и рече:
112. «О моя сыновчя, Игорю и Всеволодѣ! Рано еста начала Половецкую землю мечи цвѣлити, а себѣ славы искати. Нъ нечестно одолѣсте, нечестно бо кровь поганую пролиясте.
113. Ваю храбрая сердца въ жестоцемъ харалузѣ скована, а въ буести закалена.
114. Се ли створисте моей сребреней сѣдинѣ?
115. А уже не вижду власти сильнаго, и богатаго и многовоя брата моего Ярослава съ черниговьскими былями, съ могуты, и съ татраны, и съ шельбиры, и съ топчакы, и съ ревугы, и съ ольберы. Тии бо бес щитовь съ засапожникы кликомъ плъкы побѣждаютъ, звонячи въ прадѣднюю славу.
116. Нъ рекосте: „Мужаимыся сами, преднюю славу сами похитимъ, а заднюю ся сами подѣлимъ!“.
117. А чи диво ся, братие, стару помолодити?
118. Коли соколъ въ мытехъ бываетъ, высоко птицъ възбиваетъ, не дастъ гнѣзда своего въ обиду.
119. Нъ се зло — княже ми непособие:
120. наниче ся годины обратиша.
121. Се у Римѣ кричатъ подъ саблями половецкыми, а Володимиръ подъ ранами.
122. Туга и тоска сыну Глѣбову».
123. Великый княже Всеволоде! Не мыслию ти прелетѣти издалеча, отня злата стола поблюсти?
124. Ты бо можеши Волгу веслы раскропити, а Донъ шеломы выльяти.
125. Аже бы ты былъ, то была бы чага по ногатѣ, а кощей по резанѣ.
126. Ты бо можеши посуху живыми шереширы стрѣляти, удалыми сыны Глѣбовы.
127. Ты, буй Рюриче и Давыде! Не ваю ли злачеными шеломы по крови плаваша?
128. Не ваю ли храбрая дружина рыкаютъ, акы тури, ранены саблями калеными на полѣ незнаемѣ?
129. Вступита, господина, въ злата стремень за обиду сего времени, за землю Русскую, за раны Игоревы, буего Святславлича!
130. Галичкы Осмомыслѣ Ярославе! Высоко сѣдиши на своемъ златокованнѣмъ столѣ, подперъ горы Угорскыи своими желѣзными плъки, заступивъ королеви путь, затворивъ Дунаю ворота, меча времены чрезъ облаки, суды рядя до Дуная.
131. Грозы твоя по землямъ текутъ, отворяеши Киеву врата, стрѣляеши съ отня злата стола салтаня за землями.
132. Стрѣляй, господине, Кончака, поганого кощея, за землю Рускую, за раны Игоревы, буего Святславлича!
133. А ты, буй Романе и Мстиславе! Храбрая мысль носитъ васъ умъ на дѣло.
134. Высоко плаваеши на дѣло въ буести, яко соколъ на вѣтрехъ ширяяся, хотя птицю въ буйствѣ одолѣти.
135. Суть бо у ваю желѣзныи прапорзиъъ подъ шеломы латинскими. Тѣми тресну земля, и многи страны — Хинова, Литва, Ятвязи, Деремела и Половци сулици своя повръгоща, а главы своя подклониша подъ тыи мечи харалужныи.
136. Нъ уже, княже Игорю, утрпѣ солнцю свѣтъ, а древо не бологомъ листвие срони:
137. по Рсии, по Сули гради подѣлиша. А Игорева храбраго плъку не крѣсити.
138. Донъ ти, княже, кличетъ и зоветь князи на побѣду.
139. Олговичи, храбрыи князи, доспѣли на брань.
140. Инъгварь и Всеволодъ и вси три Мстиславичи, не худа гнѣзда шестокрилци! Не побѣдными жребии собѣ власти расхытисте?
141. Кое ваши златыи шеломы и сулицы ляцкии и щиты?
142. Загородите полю ворота своими острыми стрѣлами за землю Русскую, за раны Игоревы, буего Святъславлича!
143. Уже бо Сула не течетъ сребреными струями къ граду Переяславлю, и Двина болотомъ течетъ онымъ грознымъ полочаномъ подъ кликомъ поганыхъ.
144. Единъ же Изяславъ сынъ Васильковъ позвони своими острыми мечи о шеломы литовския, притрепа славу дѣду своему Всеславу, а самъ подъ чрълеными щиты на кровавѣ травѣ, притрепанъ литовскыми мечи, и с хотию на кроваты,
145. рекъ:
146. «Дружину твою, княже, птиць крилы приодѣ, а звѣри кровь полизаша».
147. Не бысь ту брата Брячяслава, ни другаго Всеволода: единъ же изрони жемчюжну душу изъ храбра тѣла чресъ злато ожерелие.
148. Унылы голоси. Пониче веселие. Трубы трубятъ городеньскии.
149. Ярославли и вси внуце Всеславли уже понизятъ стязи свои, вонзятъ свои мечи вережени.
150. Уже бо выскочисте изъ дѣдней славы.
151. Вы бо своими крамолами начясте наводити поганыя на землю Рускую, на жизнь Всеславлю.
152. Которою бо бѣше насилие отъ земли Половецкыи!На седьмомъ вѣцѣ Трояни
153. връже Всеславъ жребий о дѣвицю себѣ любу.
154. Тъй клюками подпръся, оконися и скочи къ граду Кыеву, и дотчеся стружиемъ злата стола Киевскаго.
155. Скочи отъ нихъ лютымъ звѣремъ въ плъночи, изъ Бѣлаграда, обѣсися синѣ мьглѣ.
156. Утрі, же вазни с три кусы, — отвори врата Новуграду, разшибе славу Ярославу,
157. скочи влъкомъ до Немиги съ Дудутокъ.На Немизѣ снопы стелютъ головами, молотятъ чепи харалужными, на тоцѣ животъ кладутъ, вѣютъ душу отъ тѣла.
158. Немизѣ кровави брезѣ не бологомъ бяхуть посѣяни, посѣяни костьми рускихъ сыновъ.
159. Всеславъ князь людемъ судяше, княземъ грады рядяше, а самъ въ ночь влъкомъ рыскаше; изъ Кыева дорискаше до куръ Тмутороканя, великому Хръсови влъкомъ путь прерыскаше.
160. Тому въ Полотскѣ позвониша заутренюю рано у святыя Софеи въ колоколы: а онъ въ Кыевѣ звонъ слыша.
161. Аще и вѣща душа въ дръзѣ тѣлѣ, нъ часто бѣды страдаше.
162. Томувѣщей Боянъ и пръвое припѣвку, смысленый, рече:
163. «Ни хытру, ни горазду, ни птицю горазду, суда Божиа не минути».
164. О, стонати Руской земли, помянувше пръвую годину и пръвыхъ князей!
165. Того стараго Владимира нелъзѣ бѣ пригвоздити къ горамъ киевскимъ.
166. Сего бо нынѣ сташа стязи Рюриковы, а друзии — Давидовы; нъ розино ся имъ хоботы пашутъ.
167. Копиа поютъ
168. на Дунаи.Ярославнынъ гласъ слышится, зегзицею незнаемѣ рано кычеть:
169. «Полечю, — рече, — зегзицею по Дунаеви,
170. омочю бебрянъ рукавъ въ Каялѣ рѣцѣ,
171. утру князю кровавыя его раны на жестоцѣмъ его тѣлѣ».
172. Ярославна рано плачетъ въ Путивлѣ на забралѣ, а ркучи:
173. «О вѣтрѣ вѣтрило! Чему, господине, насильно вѣеши?
174. Чему мѣчеши хиновьскыя стрілы на своею нетрудною крилцю на моея лады вои?
175. Мало ли ти бяшетъ горъ подъ облакы вѣяти, лелѣючи корабли на синѣ морѣ?
176. Чему, господине, мое веселие по ковылию развѣя?».
177. Ярославна рано плачеть въ Путивлѣ на заборолѣ, а ркучи:
178. «О Днепре Словутицю! Ты пробилъ еси каменныя горы сквозѣ землю Половецкую.
179. Ты лелѣялъ еси на себѣ Святославли носады до плъку Кобякова.
180. Възлелѣй, господине, мою ладу къ мнѣ, абыхъ не слала къ нему слезъ на море рано».
181. Ярославна рано плачетъ въ Путивлѣ на забралѣ, а ркучи:
182. «Свѣтлое и тресвѣтлое слънце! Всѣмъ тепло и красно еси:
183. чему, господине, простре горячюю свою лучю на ладѣ вои? Въ полѣ безводнѣ жаждею имь лучи съпряже, тугою имъ тули затче».
184. Прысну море полунощи. Идутъ сморци мьглами. Игореви князю Богъ путь кажетъ изъ земли Половецкой на землю Рускую, къ отню злату столу.
185. Погасоша вечеру зари. Игорь спитъ. Игорь бдитъ. Игоръ мыслию поля мѣритъ отъ великаго Дону до малаго Донца.
186. Комонь въ полуночи. Овлуръ свисну за рѣкою, велить князю разумѣти. «Князю Игорю не быть!» —
187. кликну. Стукну земля, въшумѣ трава. Вежи ся половецкии подвизашася.
188. А Игорь князь поскочи гор-настаемъ къ тростию и бѣлымъ гоголемъ на воду.
189. Въвръжеся на бръзъ комонь и скочи съ него босымъ влъкомъ.
190. И потече къ лугу Донца, и полетѣ соколомъ подъ мьглами, избивая гуси и лебеди завтроку, и обѣду и ужинѣ.
191. Коли Игорь соколомъ полетѣ, тогда Влуръ влъкомъ потече, труся собою студеную росу: претръгоста бо своя бръзая комоня.
192. Донецъ рече:
193. «Княже Игорю! Не мало ти величия, а Кончаку нелюбия, а Руской земли веселиа».
194. Игорь рече:
195. «О Донче! Не мало ти величия, лелѣявшу князя на влънахъ, стлавшу ему зелѣну траву на своихъ сребреныхъ брезѣхъ, одѣвавшу его теплыми мъглами подъ сѣнию зелену древу,
196. стрежаще его гоголемъ на водѣ, чайцами на струяхъ, чрьнядьми на ветрѣхъ».
197. Не тако ли, рече, рѣка Стугна, худу струю имѣя, пожръши чужи ручьи и стругы, ростре на кусы уношу князю Ростиславу. «Затвори, Днѣпрь, темнѣ березѣ», —
198. плачется мати Ростиславля по уноши князи Ростиславѣ.
199. Уныша цвѣты жалобою, и древо с тугою къ земли пріклонилось.
200. А не сорокы втроскоташа, на слѣду Игоревѣ ѣздитъ Гзакъ съ Кончакомъ.
201. Тогда врани не граахуть, галици помлъкоша, сорокы не троскоташа,
202. полозие ползоша только. Дятлове тектомъ путь къ рѣцѣ кажутъ, соловии веселыми пѣсьми свѣтъ повѣдаютъ.
203. Млъвитъ Гзакъ Кончакови:
204. «Аже соколъ къ гнѣзду летитъ, соколича рострѣляевѣ своими злачеными стрѣлами».
205. Рече Кончакъ ко Гзѣ:
206. «Аже соколъ къ гнѣзду летитъ, а вѣ соколца опутаевѣ красною дивицею».
207. И рече Гзакъ къ Кончакови:
208. «Аще его опутаевѣ красною дѣвицею, ни нама будетъ сокольца, ни нама красны дѣвице, то почнуть наю птици бити въ полѣ Половецкомъ».
209. Рекъ Боянъ на ходы на Святъславля пѣстворца стараго времени Ярославля Ольгова коганя хоти:
210. «Тяжко ти головы, кромѣ плечю, зло ти тѣлу, кромѣ головы», — Руской земли безъ Игоря.
211. Солнце свѣтится на небесѣ, Игорь князь въ Руской земли.
212. Дѣвици поютъ на Дунаи, Вьются голоси чрезъ море до Киева.
213. Игорь ѣдетъ по Боричеву къ святей Богородици Пирогощей.
214. Страны ради, гради весели,
215. пѣвше пѣснь старымъ княземъ, а потомъ молодымъ. Пѣти
216. слава Игорю Святъствличу, буй туру Всеволоду, Владимиру Игоревичу.
217. Здрави князи и дружина, побарая за христьяны на поганыя плъки.
218. Княземъ слава а дружинѣ! Аминь.

Ссылка

Если вы используете корпус в научной работе, пожалуйста, сошлитесь на эту публикацию:

Орехов Б. В. Параллельный корпус переводов «Слова о полку Игореве»: итоги и перспективы // Национальный корпус русского языка: 2006—2008. Новые результаты и перспективы. — СПб.: Нестор-История, 2009. — С. 462—473.