Реконструкция В. В. Колесова
Источник: Колесов В. В. Ударение в «Слове о полку Игореве» // ТОДРЛ. Т. 31. Л, 1976. С. 2376.
- 1. Не˽лѣпо˽ли́˽ны бя́шетъ, бра́тие, нача́ти ста́рыми словесы̀ тру́дныхъ повѣстѝи о пъ́лку Иго́ревѣ, Иго́ря Святъсла́влича?
- 2. Начати́˽же˽ся тои пѣ́сни по были́намь сего́˽времене, а не по замы́шлению Боя́ню!
- 3. Боя́нъ бо вѣ́щии, а́ще˽кому хотя́ше пѣ́снь твори́ти, то ростекаше́ться мы́слию по̀˽древу, сѣ́рымъ въ́лкомь по̀˽земли, си́зымь о̀рломь по̀дъ˽облакы.
- 4. По̀мняшеть˽бо рѐче пьрвы̀хъ време́нъ усо́бицѣ. Тогда́ пущаше́ть і̃ [десять] соколо́въ на ста́до лебедѣ̀и, кото́рыи дотечашѐ, та˽предѝ пѣ́с[н]ь пояшѐ ста́рому Яросла́ву, хра́брому Мстисла́ву, ѝже зарѣ́за Реде́дю предъ˽пъ́лкы касо́жьскыми, кра́сному Рома́нови Святъсла́вличю.
- 5. Боя́нъ же, бра́тие, не і̃ [десять] соколо́въ на ста́до лебедѐи пущашѐ, нъ̀ своя вѣ́щиѣ прь́сты на живы́ѣ стру́ны въсклада́ше, они́˽же са́ми кня̀земъ сла́ву рокота́ху.
- 6. По́чнемъ же, бра́тие, по̀вѣсть сию̀ отъ ста́раго Влади́мера до нынѣшня́го Иго́ря, ѝже истягну̀ у́мъ крѣпостию̀ своею̀ и поо́стри сердца̀ своего̀ мужество́мъ,
- 7. напъ́лнився ра́тнаго ду̀ха, на̀веде сво̀ѣ хра́брыя пъ́лкы на̀ землю Полове́цькую за̀ землю Ру́ськую.
- 8. Тогда̀ Иго́рь възрѣ̀ на свѣтло́е солнцѐ и ви́дѣ о̀тъ˽него тьмо́ю всѣ́˽своѣ воѣ̀ прикры́ты,
- 9. ѝ˽рече Иго́рь къ дружи́нѣ свое́и:
- 10. бра́тие и дружи́но! лу́цежъ бы по̀тяту бы́ти, нежѐ полоне́ну бы́ти,
- 11. а вся́дѣмъ, бра́тие, на̀ своѣ бързы́ѣ комо́ни да̀ позримъ си́него До̀ну.
- 12. Спала́˽князю у́мъ˽похоти, и˽жало́сть ему зна́мение заступѝ искуси́ти До̀ну вели́кого.
- 13. Хощу́˽бо, – рѐче, – копиѐ приломи́ти конѐць˽поля Полове́цкого, съ ва́ми, руси́ци, хощу́˽главу сво̀ю приложи́ти, а˽любо̀ испи́ти шело́момь До̀ну.
- 14. О Боя́не, соло́вию ста́рого врѐмене! абы́˽ты сиѣ пъ́лкы ущекота́лъ, скача̀, сла́вию, по мы́слену дрѐву, лета́я умо́мь подъ˽облакы̀, свива́я сла́вы оба́˽полы сего́˽времене, ри́ща въ тро̀пу Троя́ню чре́съ˽поля на̀˽горы.
- 15. Пѣ́ти бы́ло пѣ́с[н]ь Иго́реви, то̀го [Олга] вну́ку.
- 16. Не бу́ря соколы́˽занесе чре́съ˽поля широ́кая – га́лици ста́ды бѣжа́ть къ До̀ну вели́кому.
- 17. Чилѝ въспѣ́ти бы́ло, вѣ́щеи Боя́не, Веле́совъ вну́че:
- 18. комо́ни ржу́ть за Суло́ю – звени́ть сла́ва въ Кы́евѣ, трубы̀ тру́бять въ Новѣ́градѣ, стоя́ть стя̀зи въ Пути́вли. Иго́рь жде́ть ми́ла бра́та Все́волода.
- 19. Ѝ˽рече ему бу́и˽туръ Все́володъ:
- 20. оди́нъ бра́тъ, оди́нъ свѣ̀тъ свѣтлы́и, ты, Иго́рю, о̀ба есвѣ̀ Святъсла́вличя!
- 21. сѣдла́и, бра́те, сво̀ѣ бръзы́ѣ комо́ни,
- 22. а˽мои́˽ти готов́и, осѣ́длани у Ку́рьска на˽передѝ;
- 23. а˽мои́ ти ку́ряни свѣ́доми къме́ти: подъ˽труба́ми по̀вити, подъ˽шело́мы възлелѣ́яны, коне́ць копия̀ въскъ́рмлени,
- 24. путѝ имъ вѣ́доми, яру́гы имъ зна́еми, лу̀ци у̀ нихъ напряженѝ, ту̀ли отворенѝ, са́бли изо́стрени,
- 25. са́ми ска́чють, а́кы сѣ́рыи въ́лци въ по̀ли, ѝщучи с̀ебѣ чтѝ, а̀˽князю сла́вы.
- 26. Тогда̀ въступѝ Иго́рь˽князь въ зла́тъ˽стремень и˽поѣ́ха по чи́стому по̀лю.
- 27. Солнцѐ˽ему тъмо́ю пу́ть заступа́ше,
- 28. но́щь стону́щи ему грозою̀ пти́чь убудѝ, свѝстъ звѣри́нъ въстазби,
- 29. Ди́въ кли́четъ вьрху́˽древа, вели́ть послу́шати зѐмли незна́емѣ, Въ́лзѣ, и Помо́рию, и Посу́лию, и Суро́жу, и Корсу́ню, ѝ˽тебѣ, тьмуторо́каньскыи бълва́нъ.
- 30. А˽поло́вци негото́вами доро́гами побѣ́гоша къ До̀ну вели́кому, крыча́ть телѣ́гы полу́нощы, рци, лѐбеди роспущенѝ. Иго́рь къ До̀ну воѣ̀ веде́ть:
- 31. у̀же˽бо бѣды̀˽его пасе́ть пти́ць; подо́бию, въ́лци гро̀зу въсро́жать по яру́гамъ, о̀рли клекто́мь на̀ кости звѣ̀ри зову́тъ, лиси́ци бре́шуть на˽чрълены́ѣ щиты̀.
- 32. О Ру́сская зѐмле! у̀же за шело́менемь есѝ!
- 33. Дъ̀лго ночь мь́ркнеть,
- 34. заря́˽свѣтъ запала̀, мьгла́˽поля покры́ла.
- 35. Щѐкотъ славѝи успѐ, го̀воръ га́личь убудѝ.
- 36. Руси́чи вели́кая поля̀ чрьлены́ми щиты̀ прегороди́ша, ѝщучи сѐбѣ чтѝ, а́˽князю сла́вы.
- 37. Съ зара́ния въ пятъ́къ потопта́ша пога́ныѣ пъ́лкы полове́цкыѣ и, ро̀ссушась стрѣла́ми по̀˽полю, помча́ша кра́сныѣ дѣѣвкы полове́цкыѣ, а̀˽съ˽ними зла̀то, и па́волокы и драгы́ѣ окса́миты;
- 38. орътъма́ми, и япончи́цами, и кожу́хы нача́ша мо̀сты мости́ти по боло́томъ и грязи́вымъ мѣ́стомъ, и вся́кыми узоро́чьи полове́цкыми.
- 39. Чьрле́нъ˽стягъ, бѣла̀ хорюго́вь, чьрлена̀ че́лка, сре́брено стружиѐ хра́брому Святьсла́вличю!
- 40. Дре́млеть въ по̀ли Ольго́во хоро́брое гнѣздо̀, далечѐ залетѣ́ло!
- 41. Нѐ˽было оно̀ оби́дѣ порождено̀ ни˽соколу̀, нѝ˽кречету, нѝ˽тебѣ, чь́рныи во̀ронъ, пога́ныи поло́вчине.
- 42. Гзакъ бѣжи́ть сѣ́рымъ въ́лкомь, Конча́къ ему слѣдъ пра́вить къ До̀ну вели́кому.
- 43. Друга́го˽дни ве́лми ра́но кръвавы́̀ зо̀ри свѣ́тъ повѣда́ютъ,
- 44. чь́рныѣ ту́чѣ съ моря́˽идуть [съ ̀ моря и ̀ дуть?], хотя ́ тъ прикры ́ ти .д̃. (четыре) сълнца ̀. А̀˽въ˽нихъ трепе́щуть си́нии мъ́лнии, –
- 45. бы́ти гро̀му вели́кому, иттѝ дождю̀ стрѣла́ми съ До̀ну вели́каго.
- 46. Ту́˽ся копье́мъ прилама́ти, ту́˽ся са́блямъ потру́чати о шело́мы полове́цкыѣ, на рѣцѣ̀ на Кая́лѣ, у̀ Дону великого.
- 47. О Ру́ская зѐмле! у̀же не[-за] шело́менемъ есѝ.
- 48. Се˽вѣ́три, Стрибо́жи вну́ци, вѣ́ють съ мо̀ря стрѣла́ми на хра́брыѣ пъ́лкы Иго́ревы!
- 49. Земля̀ тутне́ть, рѣкы̀ мутно̀ теку́ть, по̀роси поля̀ прикрыва́ють,
- 50. стя̀зи глаголю́тъ: поло́вци ѝдуть о̀тъ˽Дона ѝ˽отъ˽моря
- 51. и˽отъ ˽всѣ́хъ сторо́нъ. Ру́скыѣ пъ́лкы отступи́ша.
- 52. Дѣ̀ти бѣ́сови кли́комъ поля̀ прегороди́ша, а хра́брии руси́ци прегради́ша чьрлены́ми щиты̀.
- 53. Я́ръ˽туре Все́володе! стои́ши на̀˽борони, пры́щеши на˽воѣ̀ стрѣла́ми, грь́млеши о˽шело́мы мечѝ харалу́жными.
- 54. Ка́мо, ту̀ръ, поскоча́ше, свои́мь золоты́мь шело́момь посвѣ́чивая, та́мо лежа́ть пога́ныя го̀ловы полове́цкыѣ;
- 55. поскѣ́пани са́блями кале́ными шело́мы ова́рьскыѣ о̀тъ˽тебе, я́ръ˽туре Все́володе!
- 56. Ка́я ра́ны, дорога̀, бра́тия, забы́въ чтѝ и живота̀, ѝ˽града Чьрни́гова о́тня злата̀ стола̀, ѝ˽своѣ ми́лыѣ хотѝ, кра́сныѣ Глѣбо́вны, свы́чая и обы́чая!
- 57. Бы́ли вѣ̀ци Троя́ни, мину́ла лѣ́та Яросла́вля, бы́ли пъ́лци Олго́вы, О́льга Святъсла́влича.
- 58. Тъ̀и˽бо О̀легъ мече́мь крамолу̀ ковашѐ ѝ˽стрѣлы по̀˽земли сѣ́яше.
- 59. Ступа́етъ въ˽зла́тъ˽стременъ въ градѣ̀ Тьмуторо́канѣ.
- 60. То˽жѐ звонъ слы́ша да́вныи вели́кыи Яро̀сла́въ,
- 61. сы̀нъ Всеволо́жь, а Влади́миръ по˽вся́˽утра [по˽вся̀ у́тра] у̀ши закла́даше въ Чьрни́говѣ.
- 62. Бори́са же Вячесла́влича сла́ва на˽су́дъ˽приведе, и на Ка́нину зелену̀ паполо́му постала̀ за оби́ду Олго́ву, храбра̀ и млада́˽князя [хра́бра и мла̀да князя̀].
- 63. Съ˽тоѣ̀ же Кая́лы Святопъ́лкь повелѣ̀ я[тѝ] отца̀ своѐго междю̀ уго́рьскими инохо́дьцы къ святѣ́и Софи́и къ Кы́еву.
- 64. Тогда̀ при Олзѣ̀ Горисла́вличи сѣ́яшется и˽ростяше́ть усо́бицами, погы́башеть жи́знь Даждьбо́жа вну́ка, въ княжи́хъ крамола́хъ вѣ̀ци человѣ́комъ скрати́шась.
- 65. Тогда̀ по Ру́скои зѐмли рѣ́дко ра́таеве ки́кахуть, нъ ча́сто вра̀ни гра́яхуть, тру́пьа сѐбѣ дѣля́че, а˽га́лици свою рѣ́чь говоря́хуть [говоряху́ть], хотя́ть полетѣ́ти на уѣ́дие.
- 66. То̀˽было въ˽ты˽ра́ти и съ˽ты́˽пълкы, а˽си́цеи ра́ти не слы́шано: съ зара́ньа до вече́ра, съ вече́ра до̀˽свѣта летя́ть стрѣ̀лы кале́ныѣ, гри́млють са́бли о˽шело́мы, треща́ть копья̀ харалу́жныя
- 67. въ по̀ли незна́емѣ средѝ землѝ Полове́цкыѣ. Чьрна̀ земля̀ подъ копы́ты костьмѝ была̀ посѣ́яна, а˽кровью̀ польяна̀; туго́ю взыдо̀ша по˽Ру̀скои зѐмли!
- 68. Что мѝ шуми́ть, что мѝ звени́ть
- 69. да́вечя ра́но предъ˽зоря́ми? Иго́рь пъ́лкы заворо́чаеть, жаль˽бо́˽ему ми́ла бра́та Все́волода.
- 70. Би́шася де́нь, би́шася другы́и, третья́го дни къ полу́днию па́доша стя̀зи Иго́ревы.
- 71. Ту́˽ся бра́та розлучи́ста на̀ брезѣ бы́строй Кая́лы;.
- 72. Ту́ кръвава́го вина̀ не доста̀,
- 73. ту̀˽пиръ доконча́ша хра́брии руси́чи: сва́ты попои́ша, а са́ми полего́ша за̀˽землю Ру́скую.
- 74. Ни́чить трава̀ жало́щами, а̀˽древо с туго́ю къ зѐмли преклони́лось.
- 75. У̀же˽бо, бра́тие, не˽весела́я годи́на въста́ла, у̀же пусты́ни си́лу прикры́ла.
- 76. Въста́ла оби́да въ си́лахъ Дажьбо́жа вну́ка. Вступи́ла дѣ́вою на̀ землю Троя́ню, въсплеска́ла лебеди́ными крылы̀ на си́нѣмь мо̀ри, у̀˽Дону плѐщучи, убудѝ жирня̀ времена̀. Усо́бица
- 77. кня̀земъ на пога́ныѣ погы́бе, реко́ста˽бо бра́тъ бра́ту: се˽моѐ, а̀˽то мое́˽же. И нача́ша кня̀зи про˽ма́лое – се˽вели́кое мъ́лвити, а˽са́ми на себѣ̀ крамолу̀ кова́ти.
- 78. А˽пога́нии съ всѣ́хъ стра́нъ прихожда́ху съ побѣда́ми на̀˽землю Ру́скую.
- 79. О! далечѐ заидѐ соко́лъ, пти́ць бия, къ˽мо̀рю,
- 80. а Иго́рева хра́брого пъ́лку не крѣси́ти!
- 81. За̀˽нимъ кли́кну Ка́рна и Жля̀, поско́чи по Ру́скои зѐмли, сма́гу мы́чучи въ пла́мянѣ ро̀зѣ.
- 82. Жены̀ ру́скиѣ въспла́кашась, аркучѝ:
- 83. у̀же намъ свои́хъ ми́лыхъ ла́дъ ни мы́слию смы́слити, ни ду́мою сду́мати, ни очи́ма съгля́дати, а злата̀ и сребра̀ ни ма́ло того̀ притрепа́ти!
- 84. А˽въсто́на˽бо, бра́тие, Кые́въ туго́ю, а Черни́говъ напа́стьми;
- 85. тоска̀ розльяся̀ по Ру́скои зѐмли, печа́ль жирна̀ тече сре́дь˽землѣ Ру́скыиѣ.
- 86. А̀˽князи са́ми на̀˽себе крамолу̀ коваху̀,
- 87. а˽пога́нии са́ми побѣда́ми нари́щуще на Ру́скую зѐмлю, ѐмляху да́нь по˽бѣлѣ̀ отъ˽двора̀.
- 88. Тии˽бо̀ два˽хра́брая Святъсла́влича, Иго́рь и Все́володъ, у̀же лжу̀ убуди́[ста], кото́рую [то] бя́ше успи́лъ оте́ць ихъ Святъсла́въ грозны́и вели́кыи кые́вскыи. Грозою̀ бя́шеть притрепета́лъ
- 89. свои́ми си́льными пъ́лкы и харалу́жными мечѝ, наступѝ на̀˽землю Полове́цкую; притопта̀ хълмы̀ и яру́гы, взму́ти рѣкы̀ и озе́ры, ѝссуши пото́кы и боло́та, а пога́наго Кобя́ка изъ˽луку́˽моря, отъ желѣ́зныхъ вели́кыхъ пълко́въ полове́цкыхъ, яко˽ви́хрь, выто́рже, и па́деся Кобя́къ въ градѣ Кы́евѣ, въ гри́дници Святъсла́вли.
- 90. Ту нѣмцѝ и венеди́ци, ту грь́ци и мора́ва пою́ть сла́ву Святъсла́влю, ка́ють кня̀зя Иго́ря, ѝже по̀грузи жи́ръ въ днѣ̀ Кая́лы, рѣкы̀ полове́цкыѣ, ру́скаго зла̀та насы́паша.
- 91. Ту̀ Иго́рь˽князь выс́ѣдѣ изъ˽сѣдла́˽злата, а˽въ˽сѣдло̀ кощи́ево.
- 92. Уны́ша бо градо́мъ забра́лы, а˽весельѐ пони́че.
- 93. А˽Святъсла́вь муте́нъ со́нъ ви́дѣ въ Кы́евѣ на гора́хъ.
- 94. Сѝночь съ вече́ра одѣва́хуъте˽мя, – рѐче, – чь́рною паполо́мою, на крова́ти ти́совѣ,
- 95. Чьрпа́хуть˽ми си́нее вино̀ съ трудо́мь смѣ́шено,
- 96. сы́пахуть˽ми то́щими тулы̀ пога́ныхъ тълко́винъ вели́кыи жемчу́гъ на˽лоно̀
- 97. и нѣ́гують˽мя; у̀же дъскы̀ без˽кнѣса̀ въ мое́мь теремѣ̀ златовь́рсѣмь.
- 98. Всю̀˽нощь съ вече́ра бо̀суви вра̀ни възгра́яху,
- 99. у˽Плѣ́сньска на̀˽болони бѣ́ша дьбрь Кыя́ню: [и] нѐ сошлю къ си́нему мо̀рю.
- 100. И˽рко́ша боя́ре кня̀зю:
- 101. у̀же, кня̀же, туга̀ у́мъ полони́ла;
- 102. се˽бо˽два̀ сокола̀ слетѣ́ста съ˽о́тня стола̀˽злата поиска́ти града̀ Тьмуторо́каня, а˽любо̀ испи́ти шело́момь До̀ну. У̀же соколо́ма кри́льца припѣ́шали пога́ныхъ са́блями, а˽самаю̀ опусто́ша въ пу́тины желѣ́зны.
- 103. Те́мно˽бо бѣ́ въ г̃ [третеи] день: два˽сълнца̀ помь́ркоста, о̀ба багря́ная стълпа̀ пога́соста и съ нима̀ молода́я мѣ́сяца, О̀легъ и Святъсла́въ, тъмо́ю˽ся поволоко́ста.
- 104. На˽рѣцѣ̀ на˽Кая́лѣ тьма́˽свѣтъ покры́ла:
- 105. по˽Ру́скои зѐмли простро́шася поло́вци, а̀ки парду́же гнѣздо̀, и въ мо̀ре погрузи́ста, и вели́кое бу́иство пода́сть Хынови.
- 106. У̀же снѐсеся хула̀ на˽хвалу̀,
- 107. у̀же тре́сну ну́жда на̀˽волю̀,
- 108. у̀же вь́ржеса Ди́въ на̀˽землю̀.
- 109. Се˽бо̀ го́тскиѣ кра́сныѣ дѣ́вы въспѣ́ша на̀˽брезѣ си́нему мо̀рю. Зво̀ня ру́скымь зла̀томь, пою́тъ время̀ Бусово, лелѣ́ютъ ме́сть Шарока́ню.
- 110. А̀˽мы у̀же, дружи́на, жа́дни веселия̀.
- 111. Тогда̀ вели́кыи Святсла́въ ѝзрони злато́˽слово, слеза́ми смѣ́шено ѝ˽рече:
- 112. о, моя̀ сыно́вчя, Иго́рю и Все́володе! ра́но еста̀ начала́ Полове́цкую зѐмлю мечѝ цвѣли́и, а̀˽себѣ сла́вы иска́ти. Нъ˽не́чьстно одолѣ́сте, не́чьстно бо кръ́вь пога́ную пролья́сте.
- 113. Ва̀ю хра́брая сьрдца̀ въ жесто́цѣмъ харалу́зѣ скована̀, а въ бу́ести закалена̀.
- 114. Се˽лѝ створи́сте мое́й сре́бренѣи сѣди́нѣ?
- 115. А˽у̀же не˽ви́жду вла̀сти си́льнаго и бога́того и многово́и бра́та мое́го Яросла́ва съ чьрни́говьскыми быля́ми, съ могуты, и съ татра́ны, и съ шельби́ры, и съ топча́кы, и съ реву́гы, и съ ольбе́ры. Тии˽бо̀ бес щито́въ, съ засапо́жникы кли́комь пълкы̀ побѣжда́ютъ, звонячѝ въ прадѣ́днюю сл́аву.
- 116. Нъ реко́сте: мужа́имѣся са́ми, пре́днюю сла́ву са́ми похи́тимъ, а˽за́днюю ся са́ми подѣ́лимъ.
- 117. А˽чи˽ди́во ся, бра́тие, ста́ру помолоди́ти?
- 118. Колѝ соко́лъ въ мы́техъ быва́еть, вы́соко пти́ць възбива́еть, не да́сть гнѣзда̀ своего̀ въ оби́ду.
- 119. Нъ˽се˽зло́˽княже ми˽не˽посо́бие,
- 120. на˽ничь ся̀ годи́ны обрати́ша.
- 121. Се уримъ крича́ть подъ са́блями полове́цкыми, а Володи́миръ подъ ра́нами.
- 122. Туга̀ и тоска̀ сы̀ну Глѣбо́ву!
- 123. Вели́кыи кня̀же Все́володе! не мы́слию ти прелетѣ́ти издалеча̀, о́тня злата̀ стола̀ поблюстѝ?
- 124. Ты˽бо̀ може́ши Въ́лгу веслы̀ раскропи́ти, а̀˽Донъ шело́мы вы́льяти.
- 125. Аже˽бо́˽ты бы́лъ, то была́˽бы чага̀ по нога́тѣ, а коще́и по рѣ ́зани.
- 126. Ты˽бо̀ може́ши по̀суху живы́ми шереши́ры стрѣля́ти, удалы́ми сыны̀ Глѣбо́вы.
- 127. Ты, бу́и Рюри́че, и Давы́де, не˽ва́ю˽ли злачены́ми шело́мы по̀˽крови пла́ваша?
- 128. Не˽ва́ю˽ли хра́брая дружи́на рыка́ють, а́кы ту́ри, ра́нени са́блями кале́ными, на̀ поли незна́емѣ?
- 129. Вступи́та, господи́на, въ злата̀ стремен[а̀] за оби́ду сего́˽времени, за̀˽землю Ру́скую, за˽ра́ны Иго́ревы, бу́его Святсла́влича!
- 130. Га́личкы Осмомы́сле Яросла́ве! вы́соко сѣди́ши на свое́мь златоќованнѣмь столѣ̀. По̀дперъ го̀ры Уго́рскыѣ свои́ми желѣ́зными пъ́лкы, заступи́въ короле́ви пу́ть, затвори́въ Дуна́ю ворота̀, меча̀ б[е]ре́мены чре́съ˽облакы̀, суды̀ рядя̀ до Дуна́я.
- 131. Гро̀зы твоѣ ̀ по земля́мъ теку́тъ, отворя́еши Кы́еву врата̀, стрѣля́еши съ о́тня злата̀ стола̀ салтани за земля́ми.
- 132. Стрѣля́и, господи́не, Конча́ка, пога́наго коще́я, за̀˽землю Ру́скую, за ра́ны Иго́ревы, бу́его Святсла́влича.
- 133. А̀˽ты, бу́и Рома́не, и Мсти́славе! хра́брая мы́сль но́ситъ вашь у́мъ на дѣ́ло.
- 134. Вы́соко пла́ваеши на дѣ́ло въ бу́ести, я̀ко соко́лъ на вѣ́трѣхъ ширя́яся, хо́тя пти́цю въ бу́иствѣ одолѣ́ти.
- 135. Су́ть˽бо у˽ва́ю желѣ́зны[и] паворо́зи подъ шело́мы лати́нскыми. Тѣ́ми тре́сну земля̀, и мно́гы стра̀ны: Хы́нова, Ли́тва, ятвя́зи, дер[е]ме́ла, и поло́вци су́лици сво̀ѣ повь́ргоша, а̀˽главы сво́ѣ поклони́ша подъ ты́ѣ мечѝ харалу́жныѣ.
- 136. Нъ у̀же, кня̀же, Иго́рю утьрпѣ̀ сълнцю̀˽свѣтъ, а̀˽древо нѐ˽бологомь ли́ствие сро̀ни:
- 137. по Ро̀си, по Су́лѣ гра̀ди подѣли́ша, а Иго́рева хра́браго пъ́лку не крѣси́ти!
- 138. Донъ˽тѝ, княже, кли́четь и зове́ть князи на побѣду̀.
- 139. Олгови́чи, хра́брии кня̀зи, доспѣ́ли на̀˽брань.
- 140. Инъгва́рь и Все́володъ, и˽вси́˽три Мстисла́вичи, не худа̀ гнѣзда̀ шестокри́лци, непобѣ́дными жребиѝ собѣ вла̀сти росхы̀тисте?
- 141. Кое˽ва́ши златы́и шело́мы и˽су́лицѣ ля́цкыѣ и щиты̀!
- 142. Загороди́те по̀лю ворота̀ свои́ми о́стрыми стрѣла́ми, за̀ землю Ру́скую, за ра́ны Иго́ревы, бу́его Святъсла́влича.
- 143. У̀же˽бо Сула̀ не тече́тъ сре́бреными струя́ми къ гра̀ду Перея̀сла́влю, и˽Дви́на боло́томь тече́тъ оны́мъ грозны́мъ полоча́номъ подъ кли́комъ пога́ныхъ.
- 144. Еди́нъ же Изя́славъ, сы̀нъ Васи́льковъ, по̀звони свои́ми о́стрыми мечѝ о шело́мы лито́вскиѣ, притрепа̀ сла́ву дѣ́ду свое́му Всесла́ву, а˽са́мъ подъ чьрлены́ми щиты̀ на кръвавѣ̀ травѣ̀ притрепа́нъ литовскы́ми мечѝ. И˽съ˽хотию̀ на крова́ть,
- 145. ѝ˽рекъ:
- 146. дружи́ну твою́, княже, пти́ць крилы̀ приодѣ̀, а̀˽звѣри кръ́вь полиза́ша.
- 147. Не˽бы́с[т]ь ту бра́та Брячи́слава, ни друга́го Все́волода; еди́нъ же ѝзрони жемчю́жну ду̀шу изъ хра́бра тѣла̀ чре́съ˽злато ожере́лие.
- 148. Уны́лы го̀лоси, пони́че весельѐ. Трубы̀ тру́бять городе́ньскыѣ.
- 149. Яросла́ве и вси вну́ци Всесла́вли! у̀же пони́зите стя̀гы своѣ, воньзи́те своѣ мечѣ̀ вереже́ни;
- 150. у̀же бо вы̀скочи́сте из дѣ́днѣи сла́вы.
- 151. Вы˽бо̀ свои́ми крамола́ми нача́сте наводи́ти пога́ныѣ на землю Рускую, на жизнь Всесла́влю.
- 152. Кото́рое бо бѣ́ше наси́лие отъ землѣ ̀ Полове́цкыѣ!
- 153. На се́дьмомь вѣ̀цѣ Троя́ни вь́рже Всесла́въ жре́бии о дѣ́вицю сѐбѣ любу̀.
- 154. Тъи клю́ками подъпьрся̀ о˽конѝ, и˽ско́чи къ˽гра̀ду Кы́еву, ѝ˽дотчеся̀ стружие́мь злата̀ стола̀ кые́вскаго.
- 155. Ско́чи о̀тъ˽нихъ лю́тымь звѣре́мъ въ полночѝ из Бѣла́града, обѣ́сися си́ни мьглѣ̀,
- 156. утъ́рже ва́зни с˽три́˽кусы: о̀ттвори врата̀ Нову́граду, ро̀сшибе сла́ву Яросла́ву,
- 157. ско̀чи въ́лкомь до Неми́ги съ Дуду́токъ. На Неми́зѣ снопы̀ сте́лють голова́ми, моло́тятъ чѣпѝ харалу́жными, на тоцѣ̀ живо́тъ кладу́ть, вѣ́ютъ ду̀шу отъ˽тѣла̀.
- 158. Неми́зѣ кръвавѣ́˽брезѣ нѐ˽бологомь бя́хуть посѣ́яни, посѣ́яни костьмѝ ру́скыхъ сыно́въ.
- 159. Всесла́въ˽князь лю̀демъ судя́ше, кня̀земъ гра̀ды рядя́ше, а˽са́мъ в ночь въ́лкомь ры́скаше: из Кы́ева дори́скаше до ку́ръ Тьмуторо́каня; вели́кому Хъ́рсови въ́лкомь пу́ть прерыскаше.
- 160. Тому въ Полотскѣ̀ позвони́ша зау́треню[ю] ра́но у святы́ѣ Софе́ѣ въ ко̀локолы – а˽о́нъ въ Кы́евѣ звонъ слы́ша.
- 161. Ащѐ и вѣ́ща душа̀ въ друзѣ́˽тѣлѣ, нъ ча́сто бѣды̀ страда́ше.
- 162. То̀му вѣ́щеи Боя́нъ и пьрво́е припѣ́вку, смы́сленыи рѐче:
- 163. ни хытру̀, ни гора́зду, ни пы́тьцу гора́зду суда̀ божия̀ не мину́ти.
- 164. О! стона́ти Ру́скои зѐмли, по̀мянувше пьрву́ю годи́ну и пьрвы́хъ князѐи.
- 165. То̀го ста́раго Влади́мера нѐльзѣ бѣ́ пригвозди́ти къ гора́мъ кые́вскимъ;
- 166. сего̀ бо ны́нѣ ста́ша стя̀зи Рюри́ковы, а друзи́и Дави́довы, нъ˽розно́˽ся имъ хо̀боты па́шутъ,
- 167. копия̀ пою́ть
- 168. на Дунаи. Ярославнынъ го̀лосъ слы́шить, зегзи́цею незна́ема ра́но кы́четь.
- 169. По̀лечю, – рѐче, – зегзи́цею по Дунаеви;
- 170. о̀мочю бебря́нъ рука́въ въ Кая́лѣ рѣцѣ̀,
- 171. у̀тру кня̀зю кръвавы́ѣ его ра́ны на жесто́цѣмь его̀ тѣлѣ̀.
- 172. Яросла́вна ра́но пла́четъ въ Пути́вли на забра́лѣ, аркучѝ:
- 173. о вѣ́трѣ вѣ́трило! чему, господи́не, наси́льно вѣ́еши?
- 174. чему мы́чеши хыновьскыѣ стрѣлкы̀ на свое́ю не тру́дною кри́лцю на мое́ѣ ла́ды воѣ̀?
- 175. ма́ло ли ты бя́шеть го́рѣ по̀дъ˽облакы̀ вѣ́яти, лелѣ́ючи кораблѣ̀ на си́ни мо̀рѣи?
- 176. чему, господи́не, моѐ веселиѐ по ковы́лию розвѣ́я?
- 177. Яросла́вна ра́но пла́четь Пути́влю го̀роду на заборо́лѣ, аркучѝ:
- 178. о, Днѣ́пре Слову́тицю! ты проби́лъ еси ка́менныѣ го̀ры сквозѣ̀˽землю Полове́цкую.
- 179. Ты лелѣ́ялъ есѝ на себѣ̀ Святосла́вли носа́ды до пъ́лку Кобя́кова.
- 180. Възлелѣ́и, господи́не, мою̀ ла́ду къ мнѣ̀, а˽бы́хъ не˽сла́ла къ нему сле́зъ на̀˽море ра́но.
- 181. Яросла́вна ра́но пла́четь въ Пути́вли на забра́лѣ, аркучѝ:
- 182. свѣтло́е и тресвѣтло́е сълнцѐ! всѣ́мъ тепло̀ и красно̀ есѝ:
- 183. чему, господи́не, про̀стре горячю́ю сво̀ю лучю̀ на ла́ды воѣ̀? в по̀ли безво́днѣ жаже́ю и́мъ лу̀кы съпря́же, туго́ю и́мъ тулы̀ затчѐ.
- 184. Прысну́˽море полу́нощи, ѝдуть смъ̀рци мьгла́ми, Иго́реви кня̀зю богъ пу́ть ка́жеть из˽землѣ ̀ Полове́цкыѣ на̀˽землю Ру́скую, къ о́тню зла̀ту столу̀.
- 185. Погасо́ша вече́ру зо̀ри, Иго́рь спить, Иго́рь бдить, Иго́рь мы́слию поля̀ мѣ́рить отъ вели́каго До̀ну до ма́лаго Донца̀.
- 186. Комо́нь въ полу́ночи, Овлу́ръ сви́с[т]ну за рѣко́ю, вели́ть князю розумѣ́ти. Кня̀зю Иго́рю не бы́ть!
- 187. Кли́кну, сту́кну земля̀, въсшумѣ̀ трава̀. Вѣжѣ˽ся̀ полове́цкыѣ подви́заша[ся],
- 188. а˽Иго́рь˽князь поско́чи го́рностаемъ къ тростию̀ и бѣ́лымь го̀големь на̀˽воду.
- 189. Въвь́ржеся на̀˽бързъ комо́нь и˽ско́чи съ него бо̀сымь вълко́мь,
- 190. и по̀тече къ лу̀гу Донца̀, и полетѣ̀ соколо́мь подъ мьгла́ми, избива́я гу̀си и лѐбеди за́втроку, и обѣ́ду, и у́жинѣ.
- 191. Колѝ Иго́рь соколо́мь полетѣ̀, тогда̀ [О]влу́ръ вълко́мь˽потече, труся̀ собо́ю студе́ную ро̀су: претъ́ргоста бо сво̀я бърза́я комо́ня.
- 192. Доне́ць˽рече:
- 193. кня̀же Иго́рю! не˽ма́ло˽ти вели́чия, а Конча́ку нелю́бия, а Ру́скои зѐмли веселиа̀.
- 194. Иго́рь˽рече:
- 195. о До́нче! не˽ма́ло˽ти вели́чия, лелѣ́явшу кня́зя на вълна́хъ, стла́вшу ему зелену̀˽траву̀ на свои́хъ сре́бреныхъ брезѣ́хъ, одѣва́вшу его те́плыми мьгла́ми подъ сѣ́нию зелену̀˽древу,
- 196. стрежашѐ е[го] го̀големъ на водѣ̀, ча́ицами на струя́хъ, чьрня́дьми на вѣ́трѣхъ.
- 197. Не та́ко ли, рѐче, рѣка̀ Стугна, ху̀ду струю̀ имѣ́я, по̀жьрши чу́жи ру́чьи и стру̀гы ро̀стрена к у́сту? Уно́шу кня̀зю Рости́славу за̀твори Днѣ́прь темнѣ́˽березѣ.
- 198. Пла́чется ма́ти Рости́слава по уно́ши кня̀зи Рости́славѣ.
- 199. Уны́ша цвѣ̀ты жалобо́ю, ѝ˽древо с туго́ю къ зѐмли прѣклони́ло.
- 200. А˽не˽соро́кы втроскота́ша – на слѣду̀ Иго́ревѣ ѣ́здитъ Гзакъ съ Конча́комъ.
- 201. Тогда̀˽врани не˽гра́яхуть, га́лицѣ помъ́лкоша, соро́кы не троскота́ша,
- 202. полозию̀ ползо́ша то́лько, дя́тлове текто́мь пу́ть къ рѣцѣ̀ ка́жуть, соловьѝ веселы́ми пѣ́с[н]ьми свѣ́тъ повѣда́ють.
- 203. Мъ́лвить Гзакъ Конча́кови:
- 204. ажѐ соко́лъ къ гнѣзду̀ лети́ть, соколи́ча рострѣля́евѣ свои́ми злачены́ми стрѣла́ми.
- 205. Рѐче Конча́къ къ Гзѣ:
- 206. ажѐ соко́лъ къ гнѣзду̀ лети́ть, а̀˽вѣ соко́лца опу́таевѣ кра́сною дѣ́вицею.
- 207. Ѝ˽рече Гзакъ къ Конча́кови:
- 208. ащѐ его опу́таевѣ кра́сною дѣ́вицею, ни˽на́ма бу́деть соко́льца, ни˽на́ма кра́сны дѣ́вицѣ, то по̀чнуть на́ю пти́цѣ би́ти въ по̀лѣ полове́цкомь.
- 209. Рѐкъ Боя́нъ и Ходы́на Святъсла́вля пѣс[н]тво́рца, ста́раго врѐмене Яросла́вля Ольго́ва кога́ня хо̀ти:
- 210. тяжко́˽ти го̀ловѣ кромѣ̀ плечю̀, [а] зло́˽ти тѣ̀лу кромѣ̀ головы̀, Ру́скои зѐмли без Иго́ря.
- 211. Сълнцѐ свѣтится̀ на̀˽небесе – Иго́рь˽князь въ Ру́скои зѐмли.
- 212. Дѣ́вици пою́ть на Дуна́и, вью́ться го̀лоси чре́съ˽море до Кы́ева.
- 213. Иго́рь ѣ́деть по Бори́чеву къ святѣ́и Богоро́дици Пирого́щеи.
- 214. Стра̀ны ра́ди, гра̀ди вѐсели.
- 215. Пѣ́вше пѣ́снь ста́рымъ кня̀земъ, а пото́мъ молоды́мъ пѣ́ти.
- 216. Сла́ва Иго́рю Святъсла́вличю, бу́и˽туру Все́володу, Влади́миру Иго́ревичу!
- 217. Здра́ви кня̀зи и дружи́на, побара́я за христья́ны на пога́ныѣ пъ́лкы!
- 218. Кня̀земъ сла́ва а˽дружи́нѣ. [Аминь].
Ссылка
Если вы используете корпус в научной работе, пожалуйста, сошлитесь на эту публикацию:
Орехов Б. В. Параллельный корпус переводов «Слова о полку Игореве»: итоги и перспективы // Национальный корпус русского языка: 2006—2008. Новые результаты и перспективы. — СПб.: Нестор-История, 2009. — С. 462—473.