Текст критического издания Р. О. Якобсона
Источник: Jakobson R. Selected Writings. Vol. IV. The Hague Paris, 1966. P. 106 300.
- 1. Не лѣпо ли ны бѣщеть, братие, начяти старыми словесы трудьныхъ повѣстии о пълку Игоревѣ, Игоря Святославичя?
- 2. Начяти же ся тои пѣсни по былинамъ
- 3. Боянъ бо вѣщии, аще кому хотяше пѣснь творити, то растѣкашеть ся мыслию по дрѣву, сѣрымь вълкъмь по земли, сизымь орьлъмь подъ облакы.
- 4. Помьняшеть бо – рече – пьрвыхъ врѣменъ усобицѣ, – тъгда пыщяшеть десять соколовъ на стадо лебедии: которыѣ дотечяше, та прѣди пѣснь пояше.
- 5. Боянъ же, братие, не десять соколовъ на стадо лебедии пущяше, дъ своѣ вѣщѣѣ пьрсты на живыѣ струны въскладаше; оны же самы къняземъ славу рокотаху: старому Ярослабу, храброму <хороброму> Мьстиславу, иже зарѣза Редедю прѣдъ пълкы Касожьскыми, красному Романови Святославичю.
- 6. Почьнѣмъ же, братие, повѣсть сию, зане же болѣзнь къняземь о земли Руськои отъ стараго Владимѣра до нынѣшьняго Игоря, иже истягну умъ крѣпостию своею и поостри сьрдьця своего мужьствъмь.
- 7. Напълнивъ ся ратьнаго духа, наведе своѣ храбрыѣ пълкы на землю Половьчьскую за землю Русьскую.
- 8. Тъгда Игорь възьрѣ на свѣтьлое сълньце и видѣ отъ него тьмою вьсѣ своѣ воѣ прикрыты.
- 9. И рече Игорь къ дружинѣ своеи.
- 10. «Братие и дружино! луче же бы потяту бути, неже полонену быти.
- 11. «А въсядѣмъ, братие, на своѣ бързыѣ комонѣ, да позьримъ синего Дону!»
- 12. Съпала кънязю умъ похоти, и жялость ему знамение заступи – искусити Дону Великаго.
- 13. «Хощю бо – рече – копие приломити коньць поля Половьчьского съ вами, Русичи; хощю главу свою приложити, а любо испити шеломъмь Дону.»
- 14. О, Бояне, соловию старого врѣмене! абы ты сиѣ пълкы въщекоталь, скачя, славию, мысльну дрѣву, лѣтая умъмь подъ облакы, съвивая славы оба полы сего врѣмене, рищя въ тропу Трояню чрѣсъ поля на горы.
- 15. ѣти было пѣснь Игореви того вънуку:
- 16. «Не буря соколы занесе чрѣсъ поля широкая; галицѣ стады бѣжять къ Дону Великому.»
- 17. Чили въспѣти было, вѣщии Бояне, Велесовъ вънуче:
- 18. Комони ръжють за Сулою – звьнить слава въ Кыевѣ; трубы трубять въ Новѣ-градѣ – стоять стязи въ Путивли; Игорь жьдеть мила брата Вьсеволода.
- 19. И рече ему буи турь Вьсеволодъ:
- 20. «Одинъ брать, одинъ свѣтъ свѣтьлыи ты, Игорю: оба есвѣ Святославичя!
- 21. Седьлаи, брате, своѣ бързыѣ комонѣ!
- 22. А мои ти готови, оседьлани у Курьска на переди.
- 23. «А мои ти Куряне – съвѣдоми къмети: подъ трубами повити, подъ шеломы възлелѣяни, коньць копия въскърмлени.
- 24. Пути имъ вѣдоми, яругы имъ знаемы, луци у нихъ напряжени, тули отворени, саблѣ изъострены.
- 25. «Сами скачють акы сѣрии вълци въ поли, ищюче себѣ чьсти, а кънязю славы.»
- 26. Тъгда въступи Игорь кънязь въ стремень и поѣха по чистому полю.
- 27. Сълньце ему тьмою путь заступаше.
- 28. Нощь стонущи ему грозою пътичь убуди, свистъ звѣ ринъ въ сьта съби.
- 29. Дивъ кличеть вьрху дрѣва: велить послушяти земли незнаемѣ – Вълзѣ и Поморию, и Посулию, и Сурожю, и Кърсуню, и тебѣ, Тъмутороканьскыи бълване …
- 30. А Половьци неготовами дорогами побѣ гошя къ Дону Великому; кричять телѣ гы полунощи, рьци – лебеди роспущены: Игорь къ Дону воѣ ведеть!
- 31. Уже бо ся бѣ ды его пасеть пъричь подоболочию; вълци грозу ворожять по яругамъ; орьли клькътъмь на кости звѣ ри зовуть; лисицѣ брешють на чьрвленыѣ щиты.
- 32. О Русьская земле, уже за шелменьмь еси!
- 33. Дълго ночи мьркнеть
- 34. заря. Свѣть запала, мьгла поля покрыла.
- 35. Щекотъ славии усъпе, говоръ галиць убуди.
- 36. Русичи великая поля чьрвлеными щиты перегородишя, ищюче себѣ <собѣ> чьсти, а кънязю славы.
- 37. Съ зарания въ пятъкъ потъпъташя поганыѣ пълкы Половьчьскыѣ и расушя ся стрълами по полю: помъчяшя красьныѣ дѣвъкы Половьчьскыѣ, а с ними злато и паволокы и драгыѣ оксамиты.
- 38. Орътъмами и японьчицями и кожюхы начяшя мосты мостити по болотомъ и грязиивымъ мѣстомъ, – и вьсякыми узорочии Половьчьскыми.
- 39. Чьрвленъ стягъ, бѣла хорюгъвь, чьрвлена челъка, сребрьно стружие храброму Святославичю!
- 40. Дрѣмлеть въ поли Ольгово хороброе гнѣздо: далече залетѣло.
- 41. Не было оно обидѣ порожено ни соколу, ни кречету, ни тебѣ, чьрныи воронъ, поганыи Половьчине!
- 42. Къза бѣжить сѣрымь вълкъмь; Коньчякъ ему слѣдъ править къ Дону Великому.
- 43. Другаго дьне вельми рано кръвавыѣ зорѣ свѣтъ повѣдають.
- 44. Чьрныѣ тучѣ съ моря идуть, хотять прикрыти четыри сълньця, а въ нихъ трепещють синѣѣ мълниѣ.
- 45. Быти грому великому, ити дъждю стрѣлами съ Дону Великого.
- 46. Ту ся копиемъ приламати, ту ся саблямъ потручяти о шеломы Половьчьскыѣ, на рѣцѣ на Каялы, у Дону Великого.
- 47. О Русьская земле, уже за шеломеньмь еси!
- 48. Се вѣтри, Стрибожи вънуци, вѣють съ моря стрѣлами на храбрыѣ пълкы Игоревы.
- 49. Земля тутьнеть, рѣкы мутьно текуть, пороси поля прикрывають.
- 50. Стрязи глаголють: Половьци идуть отъ Дона и отъ моря!
- 51. И отъ вьсѣхъ странъ Русьскыѣ пълкы оступишя.
- 52. Дѣти Бѣсовы кликъмь поля перегородишя, а храбрии Русичи прѣградишя чьрвлеными щиты.
- 53. Яръ туре Вьсеволоде! стоиши на борони, прыщеши на воѣ стрѣлами, гримлеши о шеломы мечи харалужьными.
- 54. Камо туръ поскачяше, сваимь златымь шеломъмь посцѣчивая, тамо лежять поганыѣ головы Половьчьскыѣ.
- 55. Поскѣпани саблями калеными шеломи Оварьскии отъ тебе, яръ туре Вьсеволоде!
- 56. Дая раны, дорога братие, забывъ чьстии, живота и града Чьрнигова, отьня злата стола, и своеѣ милыѣ хоти, красьныѣ Гълѣбовьны, съвычяя и обычяя.
- 57. Были сѣчѣ Троянѣ, минула лѣта Ярославля; были пълци Ольгови, Ольга Святославичя.
- 58. Тъи бо Ольгъ мечьмь ">крамолу коваше и стрѣлы по земли сѣяше.
- 59. Ступаеть въ златъ стремень въ градѣ Тъмуторокани.
- 60. Тъ же звонъ слышя давьныи великыи Ярославъ.
- 61. А сынъ Вьсеволожь Владимѣръ по вься утра уши закладаше въ Чьрниговѣ.
- 62. Бориса же Вячеславичя слава на Судъ приведе и на ковылу зелену паполому постьла за обиду Ольгову, храбра и млада кънязя.
- 63. Съ тоѣ же ковылы Святопълкъ полилѣя отьця своего межю Угорьскыми иноходьци къ святѣи Софии къ Кыеву.
- 64. Тъгда, при Ользѣ Горславичи, сѣяшеть ся и растяшеть усобицями; погыбашеть жизнь Дажьбожя вънука, въ къняжихъ крамолахъ вѣци человѣкомъ съкратишя ся.
- 65. Тъгда по Русьскои земли рѣдъко ратаеве кликаху, нъ чясто врани граяху, трупия себѣ дѣляче, а галицѣ свою рѣчь говоряху: хотять полетѣти на уѣдие!
- 66. То было въ ты рати и въ ты пълкы, а сицеѣ рати не слышяно: съ зарания до вечера, съ вечера до свѣта летять стрѣлы каленыѣ, гримлють саблѣ о шеломы, трѣщять копия харалужьная.
- 67. Въ поли незнаемѣ, срѣдѣ землѣ Половьчьскыѣ, чьрна земля подъ копыты костьми была посѣяна, а кръвию полияна: тугою възъидошя по Русьскои земли.
- 68. Чьто ми шюмить, чьто ми звьнить?
- 69. Давечя рано прѣдъ зорями Игорь пълкы заворочяеть, жяль бо ему мила брата Вьсеволода.
- 70. Бишя ся дьнь, бишя ся другыи, – третияго дьне къ полудьнию падошя стязи Игореви.
- 71. Ту ся брата разлучиста на брѣзѣ быстрыѣ Каялы.
- 72. Ту кръваваго вина не доста.
- 73. Ту пиръ доконьчяшя храбрии Русичи: сваты попоишя, а сами полегошя за землю Русьскую.
- 74. Ничить трава жялощями, а дрѣво ся тугою къ земли прѣклонило.
- 75. Уже бо, братие, невеселая подина въстала, уже поустыни силу прикрыла.
- 76. Въстала обида въ силахъ Дажьбожя вънука; въступила дѣвою на землю Трояню; въсплескала лебедиными крилы на синимь мори, у Дону, – плещючи убуди жирьна врѣмена усобицѣ.
- 77. Къняземъ на поганыѣ побѣда погыбе, рекоста бо братъ брату «се мое, а то мое же», и начяшя кънязи про малое «се великое» мълвити, а сами на себе крамолу ковати.
- 78. А погании съ вьсѣхъ странъ прихожяху съ побѣдами на землю Русьскую.
- 79. О! далече заиде соколъ, пътичь бия, – къ морю!
- 80. А Игорева храброго пълку не крѣсити.
- 81. За нимь кликну карьна, и желя поскочи по Русьскои земли.
- 82. Смагу мычючѣ въ пламянѣ розѣ, въсплакашя ся жены Русьскыѣ рькучѣ:
- 83. «Уже намъ своихъ милыхъ ладъ ни мыслию съмыслити, ни думою съдумати, ни очима съглядати, злата и сребра ни мало того потрепати.»
- 84. А въстона бо, братие, Кыевъ тугою, а Чьрниговъ напастьми.
- 85. Тъска разлия ся по Русьскои земли; печяль жирьна вътече ">срѣдѣ землѣ Русьскыѣ.
- 86. А кънязи сами на себе крамолу коваху.
- 87. А погании, сами побѣдами нарищюще на Русьскую землю, емляху дань по бѣлѣ отъ двора.
- 88. Тая бо дъва храбрая Святославичя, Игорь и Вьсеволодъ, уже дъжю убудиста, которую то бяше усъпилъ отьць ихъ Святославъ грозьныи великыи Кыевьскыи – грозою бяшеть притрепеталъ .
- 89. Своими сильными пълкы и харалужьными мечи наступи на землю Половьчьскую, притъпъта хълмы и яругы, възмути рѣкы и озера, исуши потокы и болота, а поганого Кобяка из луку моря, отъ желѣзныхъ великыхъ пълковъ Половьчьскыхъ яко вихрь вытърже: и паде ся Кобякъ въ градѣ Кыевѣ, въ гридьници Святославли.
- 90. Ту Нѣмьци и Венедици, ту Грьци и Морава поють славу Святославлю, кають кънязя Игоря, иже погрузи жиръ въ дънѣ Каялы: рѣкы Половьчьскыѣ Русьскаго злата насыпавъшя .
- 91. Ту Игорь кънязь высѣде и – седьла злата а въ седьло кощиево.
- 92. Унышя бо градомъ забрала, а веселие пониче.
- 93. А Святославъ мутьнъ сънъ видѣ.
- 94. «Въ Кыевѣ на горахъ си ночь съ вечера одѣвахуть мя – рече – чьрною паполомою на кровати тисовѣ.
- 95. Чьрпахуть ми синее вино съ трудъмь съмѣшено.
- 96. Сыпахуть ми тъщими тулы поганыхъ Тълковинъ великыи жьньчюгъ на лоно.
- 97. И нѣгують мя: уже дъскы бес кънѣса въ моемь теремѣ златовьрсѣмь.
- 98. Вьсю нощь съ вечера бусови врани възграяху.
- 99. У Плѣсньска на болони бѣшя дьбрьскы сани, и несошя ѣ къ синему морю.»
- 100. И рекошя бояре кънязю:
- 101. «Уже, къняже, туга умъ полонила.
- 102. Се бо дъва сокола сълетѣста съ отьня стола злата поискати града Тъмутороканя, а любо испити шеломъмь Дону: уже соколома крильця припѣшяли поганыхъ саблями, а самою опуташя въ путины желѣзны.
- 103. Тьмьно бо бѣ въ третии дьнь: дъвѣ сълньци помьркоста, оба багряная стълпа погасоста и въ мори ся погрузиста, и съ нима молодая мѣсяця тьмою ся поволокоста.
- 104. На рѣцѣ на Каялы тьма свѣтъ покрыла.
- 105. По Русьскои земли простьрошя ся Половьци, акы пардуше гнѣздо, и великое буиство подасть Хынови.
- 106. Уже сънесе ся хула на хвалу.
- 107. Уже трѣсну нужя на волю.
- 108. Уже вьрже ся Дивъ на землю.
- 109. Се бо Гътьскыѣ красьныѣ дѣвы въспѣшя на брѣзѣ синему морю: звонячѣ Русьскымь златъмь, поють врѣмя бусово, лелѣють мьсть Шяроканю.
- 110. А мы уже, дружина, жядьни веселия.»
- 111. Тъгда великыи Святославъ изрони злато слово сльзами съмѣшено и рече:
- 112. «О моя сыновьця, Игорю и Вьсеволоде! рано еста начяла Половьчьскую землю мечи цвѣлити, а себѣ славы искати, нъ не чьстьно ололѣста, нечьстьно бо кръвь правьдьную пролияста.
- 113. «Ваю храбрѣи сьрдьци въ жестоцѣмь харалузѣ съкованѣ, а въ буести закаленѣ.
- 114. «Се ли сътвориста моеи сребрьнѣи сѣдинѣ!
- 115. «А уже не вижю власти сильнаго и богатаго и мъноговоя брата моего Ярослава съ Чьрниговьскыми былями, съ могуты и съ Татраны, и съ Шельбиры, и съ Топчякы, и съ Ревугы, и съ Олъбѣры: тии бо бе – щитовъ, съ засапожьникы, кликъмь пълкы побѣжяють, звоняче въ прадѣдьнюю славу.
- 116. «Нъ рекоста: мужяимъ ся сами, прѣдьнюю славу сами похытимъ, а задьнюю си сами подѣлимъ.
- 117. «А чи диво ся, братие, стару помолодити?
- 118. «Коли соколъ въ мытьхъ бываеть, высоко пътичь възбиваеть: не дасть гнѣзда своего въ обиду.
- 119. «Нъ се зъло: къняже ми непособие!»
- 120. На нице ся годины обратишя <оборотишя>!
- 121. Се въ Римѣ кричять подъ саблями Половьскыми, а Володимѣръ подъ ранами.
- 122. Туга и тъска сыну Гълѣбову!
- 123. Великыи къняже Вьсеволоде! не мыслию ти прѣлетѣти из далечя – отьня злата стола поблюсти?
- 124. Ты бо можеси Вългу веслы роскропити, а Донъ шеломы вылияти.
- 125. Аже бы ты былъ, то была бы чяга по ногатѣ, а кощии по рѣзанѣ.
- 126. Ты бо можеси по суху живыми шереширы стрѣляти – удалыми сыны Гълѣбовы.
- 127. Ты, буи Рюриче, Давыде! не ваю ли злачеными шеломы по кръви плавашя?
- 128. Не ваю ли храбрая дружина рыкають, акы тури, ранени саблями калеными на поли незнаемѣ?
- 129. Въступита, господина, въ злата стремени, за обиду сего врѣмене, за землю Русьскую, за раны Игоревы, буего Святославичя!
- 130. Галичьскыи Осмомысле Ярославе! высоко сѣдиши на своемь златокованѣмь столѣ, подъпьръ горы Угърьскыѣ своими желѣзными пълкы, заступивъ королеви путь, затворивъ Дунаю ворота, мечя камени чрѣсъ облакы, суды рядя до Дуная.
- 131. Грозы твоѣ по землямъ текуть; отворяеши Кыеву врата; стрѣляеши съ отьня злата стола салътаны за землями.
- 132. Стрѣляи, господине, Коньчяка, поганого кощия, за землю Русьскую, за раны Игоревы, буего Святославичя!
- 133. А ты, буи Романе, и Мьстиславе! храбрая мысль носить вашь умъ на дѣло.
- 134. Высоко плаваеши на дѣло въ буести, яко соколъ на вѣтрѣхъ ширяя ся, хотя пътичю въ буиствѣ одолѣти.
- 135. Суть бо у ваю желѣзныѣ папьрси подъ шеломы Латиньскыми; тѣми трѣсну земля, и мъногы страны – Хынове, Литъва, Ятвязи, Деремела и Половьци – сулицѣ своѣ повьргошя, а главы своѣ поклонишя подъ тыѣ мечѣ харалужьныѣ.
- 136. Нъ уже, къняже, Игорю утьрпе сълньчь свѣтъ, а дрѣво не бологъмь листвие сърони.
- 137. По Ръси и по Сулѣ грады подѣлишя, а Игорева храбраго пълку не крѣсити.
- 138. Донъ ти, къняже, кличеть и зоветь кънязѣ на побѣду.
- 139. Ольговичи, храбрии кънязи, доспѣли на брань.
- 140. Инъгварю к Вьсеволоде! и вьси три Мьстиславичи, не худа гнѣзда шестокрильци! непообѣльными жрѣбии собѣ власти расхытисте .
- 141. Кое ваши златии шеломи и сулицѣ Лядьскыѣ и щити?
- 142. Загородите полю ворота своими острыми стрѣлами за землю Русьскую, за раны Игоревы, буего Святославичя!
- 143. Уже бо Сула не течеть сребрьными струями граду Переяславлю, и Двина болотъмь течеть онымъ грозьнымъ Полочяномъ подъ кликъмь поганыхъ.
- 144. Единъ же Изяславъ, сынъ Васильковъ, позвони своими острыми мечи о шеломы Литъвьскыѣ, притрепа славу дѣду своему Вьсеславу, а самъ падъ подъ чьрвлеными щиты на кръвавѣ травѣ, притрепанъ Литъвьскыми мечи, чи съ хотию на кровать.
- 145. И реклъ Боянъ:
- 146. «Дружину твою, къняже, пътичь крилы приодѣ, а звѣри кръвь полизашя.»
- 147. Не бысть ту брата Брячислава, ни другаго – Вьсеволода: единъ же изрони жьньчюжьну душю ис храбра тѣла чрѣсъ злато ожерелие.
- 148. Уныли голоси, пониче веселие, – трубы трубять Городьчьскыѣ.
- 149. Ярославе и вьси вънуци Вьсеславли! уже понизити стязи свои, въньзити свои мечи вережени.
- 150. Уже бо выскочисте из дѣдьнѣѣ славы.
- 151. Вы бо своими крамолами начясте наводити поганыѣ на землю Русьскую, на жизнь Вьсеславлю.
- 152. Которою бо бяше насилие отъ землѣ Половьчьскыѣ на седмомь вѣцѣ земли Трояни.
- 153. Вьрже Вьсеславъ жрѣбии о дѣвицю себѣ любу.
- 154. Тъи клюками подъпьръ ся о копли, скочи къ граду Кыеву и дотьче ся стружиемь злата стола Кыевьскаго.
- 155. Скочи отаи лютымь звѣрьмь въ полуночи из Бѣла-града: обѣси ся сини мьглѣ.
- 156. Утьрже вазни съ три кусы, – отвори врата Нову-граду, рашибе славу Ярославу.
- 157. Скочи вълкъмь до Немигы, – съду токъ: на Немизѣ снопы стелють головами, молотять цѣпы харалужьными; на тоцѣ животъ кладуть, вѣють душю отъ тѣла.
- 158. Немизѣ кръвави брѣзи не бологъмь бяхуть посѣяни, – посѣяни костьми Русьскыхъ сыновъ.
- 159. Вьсеславъ кънязь судяше, кънязьмь грады рядяше, а самъ въ ночь вълкъмь рискаше: ис Кыева дорискаше до куръ Тъмутороканя, великому Хърсови вълкъмь путь прѣрискаше .
- 160. Тому въ Полотьскѣ позвонишя заутрьнюю рано у святыѣ Софиѣ въ колоколы, а онъ въ Кыевѣ звонъ слышя.
- 161. Аще и вѣщя душя въ друзѣ тѣлѣ, нъ чясто бѣдьнѣ страдаше.
- 162. Тому вѣщии Боянъ и пьрвое припѣвъку съмысльныи рече:
- 163. «Ни хытру, ни горазду, ни пътичю гърласту Суда Божия не минути.»
- 164. О, стонати Русьскои земли, помянувъше пьрвыѣ годины и пьрвыхъ кънязь.
- 165. Того стараго Владимѣра не льзѣ бѣ пригвоздири къ горамъ Кыевьскымъ.
- 166. Сего бо нынѣ сташя стязи Рюрикови, а друзии Давыдови, нъ розьно ся имъ хоботи пашють.
- 167. Копия поють на Дунаи.
- 168. Ярославьны ми ся гласъ слышить: зегъзицею земли незнаемѣ рано кычеть.
- 169. «Полечю – рече – зегъзицею по Донови.
- 170. «Омочю бебрянъ рукавъ въ Каялы рѣцѣ.
- 171. «Утьру кънязю кръвавыѣ его раны на жестоцѣмь его тѣлѣ.»
- 172. Ярославьна рано плачеть въ Путивли на забралѣ рькучи:
- 173. «О вѣтре, вѣтрило! чему, господине, насильно вѣеши?
- 174. «Чему мычеши Хыновьскыѣ стрѣлъкы на своею нетрудьною крильцю на моеѣ лады воѣ?
- 175. «Мало ли ти бяшеть горѣ подъ облакы вѣяти, лелѣючю кораблѣ на сини мори?
- 176. «Чему, господине, мое веселие по ковылию развѣя ?»
- 177. Ярославьна рано плачеть Путивли городѣ на заборолѣ рькучи:
- 178. «О Дънѣпре Словутичю! пробилъ еси камяныѣ горы сквозѣ землю Половьчьскую.
- 179. «Лелѣялъ еси на себѣ Святославлѣ насады до пълку Кобякова.
- 180. «Възлелѣи, господине, мою ладу къ мънѣ, абыхъ не сълала къ нему сльзъ на море рано!»
- 181. Ярославьна рано плачеть Путивли на забралѣ <заборолѣ> рькучи:
- 182. «Свѣтьлое и трьсвѣтьлое сълньце! вьсѣмъ тепло и красьно еди.
- 183. «Чему, господине, простьре горячюю свою лучю на лады воѣ, въ поли безводьнѣ жяжею имь лукы съпряже, тугою имъ тулы затьче?»
- 184. Прысну море полунощи, идуть смърци: мьглами Игореви кънязю Богъ путь кажеть и – землѣ Половьчьскыѣ на землю Русьскую, къ отьню злату столу.
- 185. Погасошя вечеру зарѣ: Игорь съпить, Игорь бъъдить, Игорь мыслию поля мѣрить отъ Великого Дону до Малаго Доньця.
- 186. Комонь явъ, полуночи Вълуръ свисну за рѣкою: велить кънязю разумѣти : кънязю Игорю не быти
- 187. кладьнику. Стукну земля, въшюмѣ трава, вежи ся Половьчьскыѣ полвизашя.
- 188. А Игорь кънязь поскощи горностаемь къ тръстию и бѣлымь гогольмь на воду.
- 189. Въвьрже ся на бьрзъ комонъ и съскочи съ него босымь вълкъмь.
- 190. И потече къ лугу Доньця, и полетѣ соколъмь подъ мьглами, избивая гуси и лебеди завътроку и обѣду и ужинѣ.
- 191. Коли Игорь соколъмь полетѣ, тъгда Вълуръ вълкъмь потече, труся собою стуленую росу: прѣтьргоста бо своя бързая комоня.
- 192. Доньць рече:
- 193. «Къняже Игорю! не мало ти величия, а нелюбия, а Русьскои земли веселия!»
- 194. Игорь рече:
- 195. «О Доньче! не мало ти величия, лелѣявъшю кънязя на вълнахъ, стьлавъшю ему зелену траву на своихъ сребрьныхъ брѣзѣхъ, одѣвавъшю его теплыми мъглами подъ сѣнию зелену дрѣву !
- 196. «Стрѣжяше его гогольмь на водѣ, чяицями на струяхъ, чьрнядьми на вѣтрѣхъ!»
- 197. Не тако ти рече рѣка Стугна: худу струю имѣючи, пожьръши чюжѣ ручиѣ и стругы, ростьре на кусту уношю кънязя Ростислава, затвори дънѣ при тьмьнѣ березѣ.
- 198. Плачеть ся мати Ростиславля по уноши кънязи Ростиславѣ.
- 199. Унышя цвѣти жялобою, и дрѣво <дерево> ся тугою къ земли прѣклонило.
- 200. А не сорокы въстроскоташя: на слѣду Игоребѣ ѣздить Къза съ Коньчякъмь.
- 201. Тъгда врани не граяху, галицѣ помълкошя, сорокы не троскоташя.
- 202. По лозию пълзошя только дятьлове – тькътъмь путь къ рѣцѣ кажють; соловии веселыми пѣсньми свѣтъ повѣдають.
- 203. Мълвить Къза къ Коньчякови:
- 204. «Аже соколъ къ гнѣзду летить, соколичя рострѣляевѣ своими злачеными стрѣлами.»
- 205. Рече Коньчякъ къ Къзѣ:
- 206. «Аже соколъ къ гнѣзду летить, а вѣ сокольця опутаевѣ красьною дѣвицею.»
- 207. И рече Къза къ Коньчякови:
- 208. «Аще его опутаевѣ красьною дѣвицею, ни нама будеть сокольця, ни нама красьны дѣвицѣ, то почьнуть наю ">пътицѣ бити въ поли Половьчьскомь.
- 209. Рекъ Боянъ и про сына Святославля, пѣснотворьць стараго врѣмене – Ярославля, Ольгова, коганя:
- 210. «Хотя тяжько ти головѣ кромѣ плечю, зъло ти тѣлу кромѣ головы» – Русьскои земли безъ Игоря.
- 211. Сълньце свѣтить ся на небесе: Игорь кънязь въ Русьскои земли.
- 212. Дѣвицѣ поють на Дуни, виють ся голоси чрѣсъ море до Кыева.
- 213. Игорь ѣдеть по Боричеву къ святѣи Богородици Пирогощи.
- 214. Страны рады, гради весели.
- 215. Пѣвъше пѣснь старымъ къняземъ, а по томь молодымъ пѣти.
- 216. Слава, Игорю Святославичь, буи туре Вьсеволоде, Владимѣре Игоревичь!
- 217. Съдрави кънязи и дружина, побараюче по крьстияньхъ на поганыѣ пълкы!
- 218. Къняземъ слава, а дружинѣ чьсть!
Ссылка
Если вы используете корпус в научной работе, пожалуйста, сошлитесь на эту публикацию:
Орехов Б. В. Параллельный корпус переводов «Слова о полку Игореве»: итоги и перспективы // Национальный корпус русского языка: 2006—2008. Новые результаты и перспективы. — СПб.: Нестор-История, 2009. — С. 462—473.